काठमाडौं, असाेज १६ । सरकारले उद्योग व्यवसायमा लिँदै आएको करका दर र अन्तस्शुल्क घटाउने निर्णय गरेको छ ।
बिहीबार बसेको मन्त्रिपरिषद्का निर्णय सार्वजनिक गर्दै सरकारका प्रवक्ता एवं परराष्ट्रमन्त्री प्रदीप ज्ञवालीले सरकारले व्यवसायमा सरकारले लगाउँदै आएको करका दर तथा अन्तस्शुल्क घटाउने निर्णय गरेको जानकारी दिए ।

मन्त्री ज्ञवालीले आर्थिक ऐन २०७७ को दफा १८ उपदफा १ बमोजिम करका दरहरु र अन्तस्शुल्क घटाउने निर्णय गरिएको बताए ।
सरकारको निर्णय बिहीबारकै राजपत्रमा प्रकाशित भई कार्यान्वयनमा आईसकेको पनि उनले जानकारी दिए ।

सरकारका प्रवक्ता ज्ञवालीका अनुसार मन्त्रिपरिषदले मुलुकी अपराध संहिताका केहि कसुरहरुको मुद्दा हेर्ने अधिकारीकारुपमा जिल्लाका प्रमुख जिल्ला अधिकारीलाई तोक्ने निर्णय गरेको छ ।

मुलुकी फौजदारी कार्यविधि संहिता २०७४ को दफा १६९ को उपदफा २ ले दिएको अधिकार प्रयोग गरी मुलुकी अपराध संहिता २०७४ को दफा १२६ [क]को कसुर सम्बन्धी मुद्दा सम्बन्धित जिल्लाको प्रमुख जिल्ला अधिकारीले हेर्ने गरी तोक्ने निर्णय गरेको प्रवक्ता ज्ञवालीले बताए ।

तेजाव पीडितको नाम र फोटो प्रकाशित गरी सहयोग संकलनको नाममा रकम उठाउने कार्य पनि गैह्रकानूनी ठहर गरिएको र त्यस्तो कामगर्ने कसुरमा दण्डाधिकारीको रुपमा प्रमुख जिल्ला अधिकारीलाई तोकीएको मन्त्री ज्ञवालीले स्पष्ट पारे ।

Leave a Reply

This site uses Akismet to reduce spam. Learn how your comment data is processed.